|
|
Braandovver, koornovver en vree-ovver (1: 1- 3:17)
|
Leviticus 01
01De HEER raip Mozes en zee tegen hom oet soamenkomsttènt vandoan:
02"Zeg tegen Isrelieten: 'As ain van joe de HEER n daaier as ovver aanbaiden wil, mout dat n baist, n schoap of n bok wezen.
03Dij n brandovver aanbaiden wil en doar n koubaist veur nemt, mout n bol nemen zunder lek of brek. Hai mout hom noar ingang van soamenkomsttènt brengen, doar de HEER hom aanveerden wil.
04Hai mout zien haand op ovverdaaier zien kop leggen, den zel zien ovver aannomen worden en zel der verzoenen veur hom wezen.
05Vervolgens mout e bol slachten veur de HEER. Priesters, Aäron zien zeuns, mouten t bloud tegen aal kanten van t altoar dat bie ingang van soamenkomsttènt staait, aan sprenkeln.
06t Ovverdaaier mout vild worden en in stokken sneden.
07Zeuns van priester Aäron mouten n vuur op t altoar aanbuiten en der holt op leggen.
08Zai mouten stokken vlaais van t ovverdaaier, mit kop en vet, bovenop t holtvuur leggen van t altoar.
09Ingewanden en poten van t ovverdaaier mouten mit wotter wosken worden en priester mout ales op t altoar in rook opgoan loaten. Zo is t n brandovver, n lekker roekende goave doar de HEER nocht aan het.
10 Wil ain n schoap of n bok as brandovver aanbaiden, den mout e n ram nemen zunder lek of brek.
11 Hai mout hom slachten aan noordkaant van t altoar, veur de HEER, en priesters, Aäron zien zeuns, mouten t bloud tegen aal kanten van t altoar aan sprenkeln.
12 Hai mout t daaier in stokken snieden en priester mout stokken vlaais, mit kop en vet, bovenop t holtvuur leggen van t altoar.
13 Poten en ingewanden mouten mit wotter wosken worden en priester mout ales noar t altoar brengen en in rook opgoan loaten. Zo is t n brandovver, n lekker roekende goave doar de HEER nocht aan het.
14 Wil ain de HEER n vogel as brandovver aanbaiden, den mout e n törreldoef of n jonge gewone doef nemen.
15 Priester mout dij den noar t altoar brengen, t daaier kop ofkniepen en dij op t altoar in rook opgoan loaten. t Bloud mout e oetlekken loaten bie ziedkanten van t altoar langs.
16 Krop mit wat of ter in zit, mout e votdoun en wegsmieten op aaskebult, aan oostkaant van t altoar.
17 Den mout e vleugels inscheuren, zunder ze der òf te trekken, en vogel op t holtvuur van t altoar in rook opgoan loaten. Zo is t n brandovver, n lekker roekende goave doar de HEER nocht aan het.
|
Leviticus 02
01As ain de HEER n koornovver aanbudt, mout e bloum van waait nemen. Hai mout ter eulie overhèn gaiten en der wierook op leggen.
02Dat mout e noar priesters, Aäron zien zeuns, tou brengen. Priester pakt n haandvol waaitenbloum en eulie, mit ale wierook, en let t in rook opgoan. Dit dudt ter op dat de HEER nocht het aan haile ovvergoave op t altoar as n lekker roekende goave.
03Wat ter van koornovver overbleven is, zel veur Aäron en zien zeuns wezen. As dail van ovvergoaven veur de HEER is dat alderhaailegst.
04Veur n koornovver dat in ovent bakt wordt, mout bloum van waait bruukt worden. t Ovver mag wezen van dikke broden zunder gèst, toumoakt mit eulie, of van pladde kouken zunder gèst, dij mit eulie bestreken binnen.
05n Koornovver dij op bakploat kloarmoakt wordt, mout wezen van waaitenbloum, aanmongen mit eulie. Der mag gain gèst in zitten.
06Breek dat in stokken en gait ter eulie overhèn. Zo is t n koornovver.
07Veur n koornovver dij in paan kloarmoakt wordt, mout ook bloum van waait en eulie bruukt worden.
08n Koornovver dij mit dizze zoaken kloarmoakt is, mag de HEER aanboden worden. Hai mout priester aanlangd worden en dij zel hom noar t altoar brengen.
09Priester mout n paart van t koornovver op t altoar in rook opgoan loaten. Dit dudt ter op dat de HEER nocht het aan haile ovvergoave op t altoar, as n lekker roekende goave.
10 Wat ter van t koornovver overbleven is, dat is veur Aäron en zien zeuns. As dail van ovvergoaven veur de HEER is dat alderhaailegst.
11 In gain enkel koornovver dij de HEER aanboden wordt, mag gèst zitten. Brood mit gèst en hunneg mag ie nooit as ovvergoave veur de HEER in rook opgoan loaten.
12 t Mag de HEER wel aanboden worden bie eerste vrucht, mor ie maggen t nait as lekker roekende goave op t altoar in rook opgoan loaten.
13 Ale koornovvers mout ie zolt in doun. Zolt as taiken van t verbond mit joen God mag bie t koornovver nait ontbreken. In aal aander ovvers mout ie ook zolt doun.
14 As ie de HEER n koornovver aanbaiden van eerste vrucht, den mouten dat oaren wezen dij reusterd binnen, of fienstampte waaitkorrels.
15 Doar mout ie eulie overhèn gaiten en der wierook op leggen. Zo is t n koornovver.
16 Priester mout n paart van waait en eulie en ale wierook in rook opgoan loaten. Dit dudt ter op dat haile ovvergoave de HEER aanboden is.
|
Leviticus 03
01As ain n vree-ovver aanbaiden wil en doar n baist veur nemt, den mag dat n kou of n bol wezen, mor t baist dat de HEER aanboden wordt, mag gain lek of brek hebben.
02Dij t ovver aanbudt, mout haand op t daaier zien kop leggen en t slachten bie ingang van soamenkomsttènt. Den mouten priesters, Aäron zien zeuns, t bloud tegen aal kanten van t altoar aan sprenkeln.
03n Paart van t vree-ovver mout as ovvergoave de HEER aanboden worden: t vet rondom ingewanden en ale netvet,
04baaide nieren mit nierongels bie lennens en lutjeste kwaab van lever, dij mit nieren en aal vothoald worden mout.
05Dit aalmoal zellen Aäron zien zeuns in rook opgoan loaten, tougelieks mit t brandovver dij op t holtvuur van t altoar ligt, as n lekker roekende goave doar de HEER nocht aan het.
06As ain n vree-ovver aanbaiden wil en doar n schoap of n bok veur nemt, den mag dat n ram of n ooi wezen, mor t daaier dat de HEER aanboden wordt, mag gain lek of brek hebben.
07Dij de HEER n schoap as ovvergoave aanbudt,
08mout haand op t daaier zien kop leggen en t slachten bie ingang van soamenkomsttènt. Den mouten Aäron zien zeuns t bloud tegen aal kanten van t altoar aan sprenkeln.
09t Daaier zien vedde dailen mouten de HEER as ovvergoave aanboden worden: haile steert, bie t steertbonkje ofsneden, t vet rondom ingewanden en ale netvet,
10 baaide nieren mit nierongels bie lennens en lutjeste kwaab van lever, dij mit nieren en aal vothoald worden mout.
11 Priester dut dit aalmoal op t altoar in rook opgoan as eten en ovver veur de HEER.
12 Dij de HEER n bok as ovvergoave aanbudt,
13 mout haand op t daaier zien kop leggen en t slachten bie ingang van soamenkomsttènt. Den mouten Aäron zien zeuns t bloud tegen aal kanten van t altoar aan sprenkeln.
14 n Paart van t vree-ovver mout as ovvergoave de HEER aanboden worden: t vet rondom ingewanden en ale netvet,
15 baaide nieren mit nierongels bie lennens en lutjeste kwaab van lever, dij mit nieren en aal vothoald worden mout.
16 Priester dut dit aalmoal op t altoar in rook opgoan, as eten, as n lekker roekende goave. Ale vet is veur de HEER.
17 Vet of bloud mag ie nait eten. Dizze bepoalen blift veur Isrelieten en heur noazoaten veur aaid van kracht, woar of ze ook wonen. '"
|
|
